الجزمة بتطول … وبتخسس … اشتروا كتابي عشان تعرفوا مفاتيح النجاح.. واحضروا محاضرتي عشان اعرفكوا شفرة الكون.. وفيه ناس بتصدق وتشتري.

الناس بره بيرفعوا قضايا ع الشركات (وبيكسبوها) علشان ساعات الاعلان بيبقى فيه “كدبة” صغيرة علشان تحليه، زي مثلا ريد بل واللي حصل معاهم … وسوني مرفوع عليها قضية علشان اعلنت عن مزايا في لعبة وطلعت مش موجودة .

فيه ناس مننا بيحبوا “الوهم” بيحبوا يشتروه ويحبوا يروجوله، وبيتنازلوا عن حقوقهم كمستهلكين علشان يبقى “لارج” ( واسع يعني 😀 ) وما يهموش الفلوس ويقولك “وايه يعني ياعم نجيب غيره” !

وده اللي بيشجع ظهور منتجات خايبة زي الجزمة اللي في أول البوست.

ويحضرني جملة الحاج ادوارد نورتون في فيلم Fight Club

“We buy things we don’t need with money we don’t have to impress people we don’t like”

  • * * *

لسه شايف فيديو لواحد متخصص في “القراءة الخارقة” (أه والله.. إسمها كده)

الفيديو كله يتلخص في جملة “الدنيا قصيرة وإحنا مش هنعيش كتير”..

* * *

واحد كاتب بالظبط كده في صفحته:

“-ماجستير إدارة الأعمال من جامعة فروست أند سوليفان – لندن 2013.

-كما حصل على إحدى أهم الشهادات في مجال التنمية البشرية وعلم التدريس من نفس الجامعة وهي Life Coach Certification 2013.”

المهم إن جامعة القزاز والسلوفان دي طلعت “مؤسسة” بتعمل أبحاث ع السوق وبتقدم خدمات استشارية .. وعندها تدريب بس Business وفي كاليفورنيا-ماونتين فيو .. مش لندن ولا حاجة! 😀

شوفت الموضوع بسيط جدا إزاي؟.. المهم الإرادة… وإنك تبقى حاسب الخطوة كويس، ومحدد أهدافك.. وجايب بدلتك ومربى دقن خفيفة، وحافظ كام كلمة مكعبلين كل واحدة فيهم ماتقلش عن 10 حروف…

الشهادات والدراسات مهمة .. يعني لازم تاخد شهادات على قد ما تقدر .. شيل وعبي يا معلم .. علشان هتكتبهم كلهم جنب بعض في أماكن كتير .. منها الكارت بتاعك .. والفلاير بتاع الكورس .. والشنط البلاستك اللي هتحط فيها الكتيب الصغير اللي فيه كلمتين عن الكورس ده .. ودعوة للكورس الجاي مع خصم لحامل هذا المنشور ..

فلازم يكون فيه شهادات كتير وأسماء يصعب على أمثالنا فهمها .. زي مثلا ..

دكتور علي عليوة دكتور الراحة النفسية بعد أكلة سمك – زميل معهد سرس الليان لطاقة الودن الشمال ومحاضر بجامعة درب المهابيل والمدرب المساعد للدكتور عطعوط النمر وحاصل على 122 دبلومة في التنمية البشرية والاستشارات الأسرية وجرائم الطفل والتركيز أثناء الحمام الصبح، ده غير إن كلمة العالمي مهمة وأحب أركز عليها، علشان تظبط.

ولو إنت جامد بقى قوي وقلبك ميت .. يبقى تكتب إستشارى .. أه .. إستشاري .. وإستشاري طاقة آشعة الشمس الساعة 2 الضهر، عشان الشكل والبزنس كارد والزباين.

وبعدين لازم تكون عميق، كلمات طويلة .. لحظات صمت .. أبيات شعر .. صوت واطي … قرآن كتير .. وأحاديث كتير .. واقوال لبوذا وكونفشيوس. وممكن تكون مهيبر برضه وبتتكلم بسرعة عادي.

آخر حاجة .. إعمل أبحاث كتير عن كل الكورسات اللي المدربين قبلك عملوها .. وإحتار حاجة متعملتش .. إعملها كورس … يعني مثلا كورس فوايد النوم واقف .. أو التفكير السليم (مخ وسلاطات)، وحاجات بقى كيف تكون مشهورا … محبوبا .. مليونيرا.. عمر الشريف.. كده …

* * *

مش عايز أقول إيه الفرق بين إنك تقول للناس إتعلموا وتوريهم يتعلموا إيه وفين وبين إنك تقولهم دجل وكلام “واهي” مالوش أي تلاتين لزمة عن خط الزمن والطاقة مش عارف إيه… زي مثلا هتلاقي حاجة إسمها “عن الحرية النفسية والعلاج بخط الزمن!”

أو :

– دورة صناعة المستقبل

– دورة علم قوة طاقة البشرية

– البرمجة اللغوية العصبية

– علم ديناميكية التكيّف العصبي

– دورة التنويم بالإيحاء

اللي هو “أحيئه” بصراحة يعني 😀

* * *

بقالي كتير قوي نفسي أفهم يعني إيه “#تنمية_بشرية” .. يعني المفروض يحصلي إيه لما اتابع واحد منهم أو احضر “كورس” ولا دبلومة.

وأنا عايز افهم بدأت أقرا عنهم وأتابعهم علشان اشوف الدنيا فيها إيه، بصراحة شوفت حاجات يا إخوان (بصوت أبو إسماعيل) .. متتوصفش .. ومتتقالش .. ومفيش كلام ينفع يديها كفايتها.

بجد المثال الحي لـ Bullshit .. أو الـBluffing ..

شوية مصطلحات متألفة ومترتبة .. ومحطوطة جنب بعضها علشان تبان علم أو علوم (ماهو دلوقتي كل واحد يدخل الحمام يعمل علم وكورس جديد في التنمية البشرية).

من الحاجان اللي لقيتها حاجة إسمها علم “الديناتولجي” ..

محدش يسألني يعني إيه اللي فوق ده علشان حاولت افهم حاجة من موقعه ومن أي حد مؤمن بيه مفهمتش وتقريبا هي حاجة يصعب على أمثالي فهمها .. بس لقيت تعريف واحد كاتبه بيقول “هو العلم الذى يتناول المعلومة تركيبها ظواهرها ارتباطاتها ومراحل نشأتها ويدرس قواعد تقديمها وتطبيقات ذلك”.

حرف “خ” كتير جنب بعض!

إيه التنمية في كده؟! وفين العلم؟! .. تنميةإيه يا جدعان .. ده Motivational Speaker بـ2000 عيل من دول .. يقنعني إن ده علم .. ده قصة “حقيقية” بمليون هري من هري كورسات الوهم دي!!

“كيف تربح مليون جنيه في أسبوع.. سعر الكورس 500 دولار” 🙂

* * *

اول حاجة من شروط اني اسمي حاجة “عِلْم” ان يكون فيه تجارب “معملية”، مراقبات، تحليلات لمخرجات.. حاجات ليها “قياسات” .. عِلْم يعني ١+١=٢ .. مفيش “اصل يمكن .. اصل جايز” .. أصل الطاقة.. طاقة لما تبقى تـــــ ..

ما شوفناش حد طلع نصب باسم الفيزياء ولا الكيمياء ولا الرياضيات مثلا.. ما شوفناش بتاع فيزياء بيقول هعمل كورس “ازاي تنقل العمارة دي من الوايلي للقبة بدون معلم.. سعر الكورس ٢٠٠ دولار”… ولا بتاع كيميا عامل كورس “ازاي تحول البحر طحينة” .. ليه؟ وليه لو فيه فهم قليلين قوي؟ وبيتكشف وبيترفع.. عشان فيه “أصل”.

علشان فيه قواعد ونظريات واختبارات وتجارب ونتائج ومُدخلات واضحة ومخرجات متحللة كويس.. وحاجات كتير قوي تخلي اي واحد ما يقدرش يدعي علشان لو عمل كده العلماء اللي بجد هيسحلوه.. ليه بقى؟ علشان دول اسمهم علم.

لكن لما واحد ييجي يقولي هعلمك “شفوي كده” ازاي تحفظ ١٠٠٠ كلمة من لغة تانية متعرفهاش كل يوم.. يبقى ده بيعجن .. ولما واحد يقولي انا هعملك ازاي تقرا اي كتاب في ٣ دقايق يبقى برضه عايز شبشب على بقه.. ولما حد يقولي طلع الإيجابية من الزنقة في الزحمة والحر وتفائل ده عايز يتهزق.

ده فيه واحد مطلع علم جديد من جوا التنمية البشرية.. يقولك ازاي تدعي ربنا بالكلام الصح.. هنكلمه بالشفرة يعني؟

التنمية البشرية بتاعت المُدعين دي.. مش تنمية ولا بشرية.. واصلا هي عمرها ما كانت علم.. دول شوية دكاترة نفسيين على اخصائيين اجتماعيين أخدوا الجزء اللي بيأكل عيش وبقالهم سنين بيحاولوا يعملوه علم لوحده.

وعلشان طبق المخ المقلي يكمل.. دخلوا عليه شوية “زِن” وميديتشن وهناخد من المريض الطاقة السلبية نرجعهاله صباع كفتة يتغذى عليه.

انك تبقى Self motivated وتنقل الـMotivation دي للي حواليك مبقتش عالم كده يعني.. ولا هتبقى.

ان يكون عندك تجربة ناجحة في حياتك تحكيها للناس “يمكن” تنفعهم حاجة وانك تخليها قانون عايز كل البشر يمشوا عليه حاجة تانية.

لو الناس دول بالكمال ده والملائكية دي مش هياخدوا منكوا فلوس ومش هيألفوا كتب تتباع بملايين.

من فترة “بأف” منهم طالع يشكك في التسويق الرقمي ويقولك ده مش علم.. على اساس اللي بيعمله في المركز بتاعه علم.

بس ربنا كرمه بواحد بيفهم.. مسح بيه الارض وروقه.

انا شايف ان بتوع التنمية البشرية اللي عندنا “ناشري جهل” ومتكسبين على قفا اللي ماشي وراهم.. شايفهم بيستغلوا اللي محتاج أمل وبيدهنوله الهوا دوكو.. وشايف انهم بيستغلوا معاني جميلة جدا وكلام كويس في انهم يكسبوا من الناس، ميفرقوش عن اللي بيعبي شرايط دروس دينية وقرآن ويبيعها.

* * *

وأخيرا

تقرا كتاب يعلمك معلومة جديدة… دي تنمية بشرية.

تتفرج على عمل فني يبسطك… دي تنمية بشرية.

تشوف فيلم وثائقي تكسب منه معرفة جديدة… دي تنمية بشرية.

تسمع أغنية تعجبك… دي تنمية بشرية.

تتعلم لغة جديدة… دي تنمية بشرية.

تقابل حد جديد وتعيش تجربة جديدة… دي تنمية بشرية.

تلعب رياضة… دي تنمية بشرية.

تطلع هايكنج واوڤرنايت كامبينج… دي تنمية بشرية.

أي حاجة بتخلق اتصال جديد بين خليتين في مخك دي تنمية بشرية.

شوف ده عشان تعرف قصدي إيه

لكن البرمجة اللغوية المش عارف مين والسرنديب واقولك كل حاجة شاي بلبن واتصور في الجنينة بالمج الصبح واقولك اشراقة الصبح الجميل.. دي لاتنمية ولا بشرية… دي “كيف تكون عِلئاً“.

آخر حاجة أحب أقولها .. علشان طولت قوي عارف

“If Harry Potter’s so magical, why can’t he cure his own eyesight and get laid?”

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s