أول يوم شغل بدأ قابلت باسم مديري اللى طلع مش رخم ولا قفيل  ولا حاجة وبقينا أصحاب لغاية دلوقتى من وقت ما شوفته فى 2008 إترقيت تاني يوم مدير المشروع سألنى كنت بتعمل إيه فى مصر ( يعني شاف شكلى غير اللى قابلهم قبل كده ) قولتله كنت بعمل كذا.. طبعا سأل السؤال المعتاد اللى إتسألته لمدة سنة ونص ( وإيه اللى خلاك تسيب مصر ؟) المهم خلاني Time Keeper يعنى أتابع مواعيد الحضور والإنصراف بتاعت الموقع كله اللي كان فيه أكتر من ألف عامل و300 موظف ومهندس حاجة تخض فى أول يوم بس ده خلاني إتعرفت أكتر بالناس وإحتكيت بثقافات عمرى ما كنت أتخيل إنى أقابلها فى يوم من الأيام حتي بدأت أتعلم أوردو من أول يوم ( طبعا ما بتكلمش دلوقتي ولا حاجة ) بس كنت أعرف حاجات زي إسمك إيه ؟ هاتلي شاي .. كده يعني ..

وبدأ التعامل مع المدير بتاعي المباشر باسم وأجن بني آدم فى الدنيا حسان الـ Camp Boss اللى كنت فى الأول بسترخمه جدااااااااااااااا .. بس طلع عيل جدع وفادني كتير وبقينا برضه أصحاب إتمرمطت قوي .. قوي جدا خالص، شوفت أيام أسود من الشغل فى مصر كنت بقوم الساعة 6  وألبس وأخرج وأرجع الساعة 2 وأنام وهكذا.

أنا بطبيعتي النوم مش مهم كتير من زمان وكمان لما دخلت الجيش مابقاش مهم خالص ( أنا قولت الجيش كذا مرة عشان كانت من أهم التجارب اللى غيرتني جامد ) وإستمريت ع الحال ده 3 شهور لغاية ما إترقيت تاني وبقيت ماسك كل الـ Time Keepers اللى فى الموقع ده غير إنى بدأت أعمل الرواتب بتاعت الشركة وأساعد الحسابات كل شهر وكانت العملية بدأت تريح شوية والدنيا تبقي جميلة والمصريين فى الموقع يزيدوا وإتنقلت من السرير أبو دورين فى الموقع لأوضة كبيرة أنا وباسم وأحمد ( مهندس مصري ) كننا إتصاحبنا جامد جدا بنخرج مع بعض على طول، بنسهر مع بعض تقريبا كل يوم .. فقعدنا مع بعض فى الفيلا اللى الشركة مأجراها للموظفين ( الناس اللى كانوا جايين معايا فضلوا زي ماهما ما إتحركوش لا فى الشغل ولا فى السكن ولا أى حاجة )  وبعد 6 شهور إترقيت مرة كمان وبقيت HR Assistant قد الدنيا 🙂

أفتكر فى الوقت ده الشركة جابوا برنامج للـ HR كانا جايبين واحدة تمسكه فأنا كنت بعلمها عليه وهي مش عارفة تشغله منين وإزاي فأنا إتعصبت عليها وقولتلها شوفي حد من شركة البرنامج يعلمك راحت إشتكت لمدير المشروع (واسطة) راح مكلمني كلمتين مالهومش لازمة لما شافني فى الموقع قدام الناس، فأنا  خليته خلص ودخل مكتبه وروحت داخل المكتب عليه ولا خبطت ولا عملت .. هو شاف شكلى راح قايللى إشرب ميه وإهدي 🙂 ، المهم إديتله اللى فيه النصيب كلام وفهمته إن مش فارقة معايا أي حاجة وارجع مصر عادي بكرة بس مالكش الحق تكلمني بأى شكل أى كان بره حدود الشغل، بعدها بأسبوع إداني مكتب لوحدي ومشاهاا وخلاني مسئول عن البرنامج 🙂 ، وفضلت أتنطط كده فى الشركة من سكيوريتي لتايم كيبر لـHR .


مع إن باسم قاللى شكلك مش هتقعد كتير يامعلم فى البلد دي 🙂 ، ليه بقي ؟ لإن فى الوقت ده كنت بدأت أقابل البنات اللى إتعرفت عليهم فى فيسبوك وأقابلهم ويودوني الصبح ع الموقع ومكانتش عربية واحدة كانوا كتير 🙂 كنت عامل زي القطر، ده غير إن أول أسبوع إتعرفت على الـIT  بتاع الشركة كان إسمه يامن من سوريا فقولتله يقولك إيه ؟ هو مفيش مكان الواحد يخرج فيه هنا ؟ قاللى ليك فى السهر  قولتله أساسي ؟ وكانت هي دي من يومها ولمدة سنة ونص كنت تقريبا (يوميا) فى LUCE  أو MOODZ  (اللي عايشين فى العين هيعرفوهم) فطبعا كنت بسهر يوميا بروح الشغل الساعة 7 الصبح ، بس كنت مستمتع إنى عايش بنفس الطريقة زي مصر من غير تغيير، وإنى طبعا قابلت الناس اللى أعرفهم أونلاين بس ده غير الناس الجداد اللى إتعرفت عليهم فى الشركة.

ما أنكرش إن أيام الشركة دي كانت أيام صعبة جدا، مرتب قليل قوي، بلد جديدة، مدير مشروع ( فردة بوت شمال ) بيكره الناس كلها والناس سبحان اللى بيبادلوه نفس الشعور، أفتكر فى آخر أيامه عمل مدبحة ( تفنيش ) كان بيمشي أي حد لدرجة إنه دخل عليا المكتب مرة بيقوللى (هو إنت لسه ما إتفنشتش ؟) الحمد لله هو مشي وأنا قعدت بعده تاني إتغير عليا إتنين شبهه واحد كان مش عارف المشروع ده أصلا بتاع إيه والتاني كان تقريبا بقال، الشركة كان حظها وحش قوي وتحس إن المشروع ما بيتحركش حتي فى آخر أيام كننا تقريبا ما بنقبضش وكان المرتب يتأخر بالشهرين فالحين يرقوني ويزودوا المرتب وما يقبضونيش 🙂 طبعا أنا فى الوقت ده قررت إنى أدور على شغل تاني وأمي فى العين ، كنت عايز أشتغل فى دبي ، كان صعبان عليا أمشي وأسيب الشركة ، بس الناس اللى جايين معايا مشيوا (كلهم رجعوا مصر) حتي باسم كان ناوي يمشي وأحمد وحسان كلهم ماشيين، فى الوقت ده كنت فى أول أيام أقابل فيها مراتي 🙂  كانت هي فى دبي وأنا فى العين طبعا معاناة إنى أسافر كل جمعة الصبح عشان أشوفها وأرجع تاني بالليل عشان الشغل الساعة 7 الصبح يوم السبت فضلت على كده تقريبا 4 شهور لغاية ما لقيت شغل فى دبي …
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s