صباح الخير ..
بعد ما إتكلمت (هنا) عن إستبدال التليفزيون العادي .. بمواد مختارة تشتغل على “لابتوب” وتتعرض على شاشة التليفزيون علشان نحمي ولادنا من الأفلام العربي اللي زي أفلام السبكي وأمثاله أو من الأفلام الأجنبي اللي ممكن يسمعوا/يشوفوا حاجات مش وقتها في السن الصغير.

ناس كتير تفاعلوا وبعتبولي بيقولولي لو عندك نصايح تفيد في التربية 😀
أولا مش متخصص .. يعني اللي بقوله مش عارف علمي ولا لأ ولا صحيح ولا لأ ولا أنا بتاع “تنمية بشرية” (الحمد لله) 😀
ثانيا  أنا أب “مبتدئ” 😀 عندي بنتين واحدة 8 سنين والتانية تقريبا 8 شهور معنديش الخبرة الكافية إني أقدم نصايح بقلب جامد بس ممكن أقول اللي أنا شخصيا هعمله مع ولادي .. واللي هحاول بقدر الإمكان أحققه .. واللي معرفش إذا كان صح أو غلط .. بس أكيد أنا شايفه أحسن كتير لولادي من الأساليب اللي ناس كتير بيتبعوها في تربية أولادهم .. شوفتها مع أصحابي .. أو ناس أعرفهم أو حتي أنا شخصيا، اللي هكتبه مالوش دعوة بالدين علشان محدش يقوللي الأحسن نحفظهم ونعلمهم كذا .. أو لا دي مذكورة 🙂 ولا بعادات علشان برضه محدش يقولي أصل ما بيجوش إلا بكده .. أصل مش عارف مين عمل حادثة فين 🙂 .

من الحاجات المؤثرة في حياة أي طفل :
1- طبعا الأب والأم نفسهم .. هيقلدهم ويحس بزعلهم وفرحهم وبيبقوا بالنسبه له مثل أعلى في كل وأي حاجة، علشان كده من سنة تقريبا .. “وطي صوتك” 🙂 ما تشتمش قدامهم .. ما تدخنش قدامهم (يعني في البلكونة مش جنبهم).
وطبعا كل سن ليه مرحلة .. يعني من أول ما يبدؤا يتكلموا ما تكدبش قدامهم ما تقولش مش فاهمين حاجة،أصلا لازم جملة “ده لسه صغيرين مش فاهمين حاجة” تختفي من حياتك.
اللي توعده/هـا بيه تجيبه من غير كلام .. مفيش مجال للنسيان أو تقول مش معايا .. لو وعدت جيب لإنهم ما بينسوش وبيبقي في دماغهم إنك خذلتهم .. ياتقول من الأول قول لأ .. واللي هو برضه لازم يتعودوا عليها (لأ) في نفس الوقت.، القصد إن كلامك يبقي واحد.

2- العقاب طبعا مش ضرب بأي حال من الأحوال، الضرب (من رأي) ممنوع تماما مش هيحل حاجة، لو بنت هتبقى نتايجه .. يا تبقي كارهة لكل وأي حاجة إسمها راجل .. أو تبقي شايفة إن ده العادي والطبيعي وتقبله من جوزها أو خطيبها بعد كده أو إن بيتمك بالنسبة لها جحيم عايزة تخرج منه بأى وسيلة وخلاص، وده يترتب عليه قبلو ظروف وجواز وأى بنى آدم يأمنلها ده.
ولو ولد، الإهانة هتأثر على شخصيته كتير يا هيطلع عنيف يا معقد يا عبيط.
والتوبيخ ليه أوقات وليه مراحل  .. يعني حاسب على إبن/بنتك وهما أكبر شوية وقاعدين مع صحابهم .. مينفعش تزعقلهم قدامهم 🙂 الكلام ده من 6 سنين مثلا .. علشان بدأ يبقالهم شخصية .. بتتشكل في السن ده .. يا تخربها .. يا تبنيها 🙂

العقاب مش بالـ Naughty Corner والهري ده .. العقاب بمنع الحاجة اللي بيحبها  (مصروفه – لعبة – خروجة) ده مؤثر بكتير أكتر مالضرب والكورنر والشتيمة، ده غير المناقشة والكلام مع بعض عن الخطأ مهم جدا ومفيد جدا.

3- المدرسة .. إختار مدرسة كويسة مش لازم تبقي غالية بس كويسة، روح شوفها .. وقابل المدرسين وشوف الطلبة، وإعرف إنت بتتعامل مع إيه 🙂 ، وما تعملش مدرسة تانية في البيت .. الحياة مش كده .. 🙂

وده يجيبنا لرقم 4 
4- التلفزيون والإنترنت 🙂 … إتعامل معاهم كأنهم وسيلة تعليمية .. يعني بتعلم طفلك من غير ما تحسسه إنه رجع البيت علشان يبدأ مدرسة جديدة 🙂 وده هتلاقيه ( هنا ).

الحاجة المهمة جداااا بقي .. إبنك وبنتك مش جايين الدنيا علشان يحققوا (حلمك) الشخصي، وإنهم ينجحوا في اللى إنت فشلت فيه، أو يبقوا نسخة منك.
هما جايين الدنيا يحققوا حلمهم هما … إنت عايزهم يبقوا إيه دي مشكلتك إنت مش مشكلتهم هما .. إنت معرفتش تبقى دكتور وعايزه يبقي .. دي مشكلتك إنت .. أو إنت مهندس وعايزه يبقي زيك برضه دي مشكلتك إنت .. مش مشكلته هو/هي.

بجانب الكلام ده .. حاول تقرا إبنك/بنتك وتعرف بيحبوا إيه ؟ هاتلهم ألعاب في كل المجالات .. وشوف أي واحدة بتشدهم أكتر وإبدأ جيب اللي زيها كتير .. وشوف حاجات بتتكلم عن نفس الموضوع .. يعني مثلا لو حابب يرسم .. هات أدوات رسم .. وهاتله كل حاجة خاصة بالرسم .. وهاتله ألوان ما بتثبتش علشان يرسم ع الحيطة براحته 🙂 ( أكيد موجودة … مش عارف فين بس موجودة)، وكل ما يكبر شوف الجديد في المجال اللي هو بيحبه وهاته .

موضوع الألعاب بقي Video Games ما تسمعش لأعداء التكنولوجيا بتوع بتحرض ع العنف 🙂 كل الدراسات قالت إن ده كلام فاضي .. بالعكس دي بتنمي كتير قوي، وبعدين فيه عقل في الإختيار (علشان اللي هيعترضوا) مش معقول تجيب لولد عنده 5 سنين لعبة borderlands مثلا، إنت العاقل وعارف إيه اللي يناسب، وكل سن ليه ألعاب.

طبعا كل ده بجانب البيئة والمكان اللي هتربيه فيه ..
فيه حاجات بتتغير مع الوقت .. مش كل سن تعامله بنفس الطريقة ..  

*** تحديث ***
لقيت البوست الجامد ده 

https://www.facebook.com/heba.sabry.56/posts/10154947614215416

وده موقع متخصص في التعليم المنزلي 

https://ibn-khaldon.com/

ده اللي انا هتبعه ،، وربنا يقدرني عليه 😀 
لو وصلت للسطر ده .. #شير يمكن حد يهمه الموضوع 🙂
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s