من كام يوم لقيت المغني بتاع كايروكي (حاجة عيد) مش فاكر ناشر لينك من بلوج مكتوب عليه “إوعي تتجوزي مصري”، المهم قولت … حتى لو اللي كاتبه يقصد العنوان أكيد هيبقى كوميدي … وأهو نشوف رأي اللي كاتب.

دخلت … لقيت بتاعة كده من تقريبا ١٥ سطر .. مالهاش أي تلاتين لزمة … حد “فيمنست” معقد وفاضي تجربته الشخصية حارقاه وكاتبها.

أنا قولت ده رأي … وأنا أصلا مواضيع مين يتجوز منين عمرها ما في دماغي … يعني مش من بتوع … بنت بلدي أولى والبنت أولى بإبن بلدها والهري التعبان ده.. والمقال عمره ما كان هيفرق معايا لو كان عادل مش مبني على تجربة شخصية .. خلفت وراها بني آدم مريض … بيحاول يدي لكل واحد عقدة م اللي عنده.

المهم … دخلت أشوف باقي الكتابات العبقرية … لقيت مقال إسمه “إوعى تتجوز مصرية” … قولت حلو جدا كده أحبك وأحترمك يا كاتب المقال الأولاني … وإنت مش “فيمنست” متطرف ولاحاجة … دخلت … لقيت بقى “معلقة” بتمدح في الستات المصريات … وإن الرجالة المصريين موقفين أحلامهم .. وإننا كائنات فضائية جاية غزو على كوكب “ألطف الكائنات” وضيعنا مستقبلهم … يعني لقيت الكاتب مش “فيمنست” متطرف … ده داعشي !!!!

أولا أنا مش مقتنع بموضوع “فساد جنس كامل” دي … يعني مش معقول كل رجالة مصر مفيهومش واحد “عجبك” .. أكيد واحد منهم عنده حاجة “هتعجبك” … مش معقول يعني إنتي جربتيهم كلهم وبعدين حكمتي … ده ما يبقاش تكوين رأي … دي محاولة لتكوين “شبكة” 🙂

مفيش حاجة إسمها كل الرجالة وحشين … فيه أكيد كويسين .. فيه أكيد محترمين … ولو اللي ما بيكالش محشي كويس .. فدول منهم كتير هنا … تعالي الإمارات المحرومين كتير.

برضه مبفهمش اللي بيقول “كل المصريات/العرب وحشين” … (مع إني مش متجوز عربية) .. بس مقدرش أقول كلهم وحشين … أكيد فيهم كويسين .. ينفعوا الكويسين من الرجالة، وعلى فكره ده تقريبا اللي بيحصل .. ودول اللي ما بنشوفلهمش بوستات ولا مقالات بتتكلم عن سعادتهم … إحنا بنشوف بوستات ومقالات “التعساء” الوحشين اللي قابلوا بعض وارتبطوا وبيحكوا عن تعاستهم وعقدهم .. وعلشان يعقدوا غيرهم … لغاية ما ظهرت طبقة من البني آدمين (من الجنسين) ما اتجوزوش أصلا 😀 و بيشتكوا من الجنس التاني ومن الجواز … طب إزاي أكابتشن ؟  … 

لو كل طرف شغل نفسه بنقد التاني … بدون إصلاح أخطائه الشخصية … هيطلع جيل زي كاتب المقال … متجوز و ( مستعد للحرب) ومترقب … وهتطلق أو يطلق ويرجع مش معقد بس … هيكون عيان … ويبقى عامل زي اللي دخل السجن سارق جزمة من قدام الجامع … طلع عبد الملك زرزور.

أنا مش هقعد أكتب ما تتجوزش مصرية … وأعد في الحاجات اللي خليتني أقول كده … بس هقول … ما تتجوزش واحدة شبه اللي كاتبة المقال … وما تجيش جنبها … ولو في شارع لف م الشارع التاني … لإنها حاجة من أربعة … 

يا إتجوزت ومحصلش نصيب وما إتفقوش لأي سبب … والموضوع أثر عليها قوي وهتشوفه فيك في كل حركة متعجبهاش.
***(محدش يفهم إني بقول المطلقة ما تتجوزهاش .. المطلقة السوية أو المطلق السوي .. بني آدم عادي جدا زي وزيك … أنا بتكلم عن المعقدين منهم)
وجب التوضيح علشان (الأمخاخ) الضيقة 🙂

يا إتجوزت وهي جاية بعقدها من عند أبوها .. وطلعت “ميتشين” أم الراجل …

أو إتجوزت عيل واطي خربلها دماغها …  

أو مرت بتجارب “كتشير” قوي … وكلهم كانوا عيال (ولود جزمة) “صحاب السوء ضحكوا عليا وغرقوني … لفولي حاجة بني وشربوني” …. 

أو إنها مدعية زياطة بتكتب عن حاجة متعرفهاش ولا جربتها.  

في كل الحالات .. ما زالت “تجربة فردية” مالهاش أي تلاتين لزمة … 

والجواز من مصري/مصرية مش واجب وطني .. ولا واجب أصلا … اللي يتجوز .. يتجوز من أي حتة ومن أي بلد .. 

بس يخلي باله إن مش كل الجنسيات التانية شارليز ثيرون .. وهي تخلي بالها إن مش كل الجنسيات التانية ماثيو ماكونهي !! 

مش كله بيلعب رياضة، وبياكل صحي .. وبيجيب ورد الصبح وبالليل .. وبيعزم كل أسبوع في مطعم جديد .. 

ومش كله .. ما بيتخنش .. وما بيكتأبش … وما بيتعصبش … وما بيتشغلش بالعيال 

لا لا خالص … البشر واحد بنفس المقاييس .. كل اللي في مصر موجود بره .. بس في مصر مش باين قوي … 

بس 🙂
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s