طبعا التجارب ( العاطشفية ) كانت كتير ( مش كلها عاطشفية  ) مش كازانوفا يعني .. بس كان حظي فى رجليا ، ما بين دراسة لشغل لـ  Clubs من الحاجات اللى شكلت شخصيتي وخليتني أفهم ( شوية ) الستات بيفكروا إزاي ، ومع كل ده والماضي المليان ( حركات ) إتجوزت أول مرة فى ( الصالون ) يعنى ( متدبرة ) J وطبعا كانت نهاية مش سعيدة خالص .
يمكن نهاية مش سعيدة عشان أنا مش مقتنع بموضوع الصالون ده ؟ يمكن أنا نفسي ما أنفعش ، يمكن عشان العلاقات عاملة زي البازل لو الإتنين ما ركبوش على بعض لازم واحد فيهم أو الإتنين بيتكسروا ، بس من زمان ولغاية دلوقتى أنا مش مؤمن ولا مقتنع بالجواز التقليدي اللى هو بالصور واللي يروح البيت يتفرج عليها ، عجبته يوافق ولو ماعجبتوش برضه يوافق عشان عيب ( إحنا دخلنا بيتهم يابني ) ولو كمل عشان يثبت أهله وحب ينهي الموضوع فى الخطوبة يتقاله ( عيب إنت بقالك سنة داخل خارج عليهم ، الناس يقولوا إيه ؟؟!! ) ولو إتجوز والموضوع ما نفعش برضه يبقى ( حرام عليك تاخدها وترميها ) ولو خلف والموضوع باظ يبقي ( حرام عليك ولاك يتبهدلوا ) يعنى الموضوع كله – حياة تحت التهديد – إنت وهي ما لكوش أى لزمة فيها ( كلام الناس وعائلاتكوا والعيال ) هما اللى متحكمين وبيدوروا حياتكوا .. وعائلاتكوا فى الأصل هما اللى متجوزين بعض  مش إنتوا الإتنين ، طبعا غير الطلبات المجحفة ( الشقة ، العفش ، الفرحين ) وطبعا النيش J أهم كائن فى البيت ( قبل حضرتك شخصيا ) ده غير إن للأسف البنات بيبقوا عايزين يهربوا من بيوتهم فاكرين إن جوزها هيعيشها فى ديزني لاند كل يوم وهياكلوا برة تقريبا يوميا 3 مرات ، ولما بتتجوز بتتصدم بالراجل اللى بيشتغل تقريبا كل اليوم وبيرجع مش قادر يتكلم وياكل وينام زي القتيل ويصحي زي ( الروبوت ) الصبح عشان يروح الشغل تاني ، ما بقولش إن ده صح لازم يبقى فيه وقت للعيلة والبيت والرغي J بس ده اللى بيحصل ، وهو بقي بيبقي فاكر إنها هتفضل نفس البنت اللى كان بيشوفها فى زياراته أيام الخطوبة طبعا بيتصدم بيها لما بيشوفها وهي صاحية من النوم وهي بتاكل على راحتها بيبقى فاكر إنه متجوز ( غسالة زانوسي ) ومكواة فيلبس ، طبعا هي لو مش شغالة وقاعدة في البيت فده واجبها ( مع إن الإصل برضه إنها لو حتي قاعدة فى البيت إنك تجيبلها حد يخدمها يا نجم ) لكن لو شغالة وحضرتك وافقت بالشغل يبقى لازم تعمل زيها  ، أيون زيها المساعدة مش هتخرب الدنيا بالعكس هتبنيها وتحافظ عليها، إتربينا إن القوامة إن رجليك تتغسل كل يوم بالليل  وتربيتنا برضه ( أربطي ) أمه بعيلين يروشوه حتى لو هو ميقدرش فى أول حياتهم إنه يدعم ده .
 الكلام عن العلاقات طويل قوي فيه ناس هتقتنع بكلامي وفيه ناس ( طبعا ) لأ ، أنا مصدق إن مش كل جواز الصالونات فاشل وفيه ناس نجحوا بس أغلب الناجحين مكملين لأسباب بعيدة خالص عنهم ، الآخِر محدش يقول أنا بعمل أكتر من التاني ، ومحدش ( يسفه ) من مجهود التاني ، إرغوا مع بعض فى كل حاجة وفى أى حاجة مفيش لا كسوف ولا إحراج ولا ( خوف ) لو الكلام مات بينكوا تبقي خلصت .

ويمكن التجربة بتاعتي دي من الحاجات اللى خلتني أسيب مصر ( القشة التي قصمت ظهر البعير ) ومع كل حبي لمصر ولعيلتي قررت أسافر .. فين ؟ إزاي ؟ هعمل إيه ؟ مش عارف ، هاخد كام ؟ مش مهم ، المهم إني أمشي .
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s