قالك إكتب حاجة إنت أسلوبك كويس J .. قروا الكلمتين اللى كتبتهم بوصف بيهم اللى حسيت بيه لما نزلت مصر بع 5 سنين إفتكروني بعرف أكتب ، الموضوع ببساطة إنى كنت كاتب مشاعر صادقة جدا لإن أهلى فعلا كانوا واحشني J.
فخلينا متفقين على حاجة ، محدش قالك إدخل إقرا ، إنت اللى إتسحبت وروحت دوست على اللينك ترجع بقى تقول ده أى كلام أنا حذرتك ، أنا صلا مش عارف هكتب عن إيه فهسيب إيدي تكتب اللى ييجي على بالى ما بين حاجات حصلت قبل ما أسافر وبين سفري واول ما وصلت ، ومشوار الـ5 سنين الطويل هنا .
حصلت حاجات كتير قوي مش عارف هفتكرها كلها ولا لأ الذاكرة على قدها ده غير إن مفيش موهبة كتابة أصلا فتخيل الوضع العظيم اللى أنا فيه J أقولك فيه فوق ( X ) دوس عليها وأخرج  ويا دار ما دخلك شر .. وقشطة قوي السطرين اللى قريتهم .
طبعا فيه حاجات خاصة قوي مش هينفع أكتبها وحاجات ممكن ماتعجبش ( المودام ) وأنام ع الكنبة بسببها ، مكن نبقي نشيش مع بعض وأحكيهالك فى أي وقت .


لو عينيك جابوك ع السطر ده يبقى قررت/ى تكمل J تعالالي بقي .
طول عمري عيل رخم بتاع خناق ومشاكل ثورجي كده من صغري ومش عاجبني حد ولا حاجة ، كان عندي 10 سنين وكان معايا ولد شغال على عربية رمسيس مع أبوه ، كنت معجب بالموضوع جدا بييجي معاه 20 جنيه المدرسة يخرب بيته ، لأ أنا لازم أشتغل بقي طبعا أبويا الراجل الموظف على درجة مدير عام بيسمع إبنه وهو بيقوله “بابا .. أنا عايز أشتغل على ميكروباص” J بس !! مش لازم أقول اللى حصل لإنه أكيد متوقع وبعدين أبويا ما بيضربش عادي كده زي كل الأبهات لأ سيادتك دي بيضرب بالدماغ بالبونية ( يرفع بالنُص ) كده يعني .

المهم بعد ما خفيت كلمني وقاللى فعلا عايز تشتغل ؟ قولتله أه راح موديني شغل عند ناس أصحابه فى محل ملابس فى وسط البلد .. وهنا بدأت رحلة +18 للعبد لله ، حاجات ماشوفتهاش قبل كده وكلام ما سمعتوش قبل كده ، أفعال وطرق فى الكلام والبيع والمعاملة بين الناس جديدة عليا ولإني كنت بشتغل فى الصيف الدنيا كانت بتبقي زحمة موت ، ناس من كل حتة فى مصر ومن كل حتة فى العالم العربي .. ويمكن من العالم كله ، طبعا إنت عارف يعنى إيه وسط البلد فى العاصمة فى الصيف حاجة فُل قوي .
 
 
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s